Bunaíodh Coláiste Belvedere sa bhliain 1832 agus faoi láthair tá beagnach míle dalta ag freastal ar an gColáiste.   Is meánscoil do bhuachaillí amháin í faoi choimirce na n-Íosánach.

Tá an scoil suite i gcroílár chathair Bhaile Átha Cliath idir Cearnóg Parnell agus Cearnóg Mhuinseo.   Tá áit lárnach ag an gceantar i saol na scoile mar gur cheantar faoi mhíbhuntáiste é.   Tá brainse láidir de Chumann Naomh Uinsionn de Pól ag feidhmiú sa scoil agus téann baill an Chumainn amach ar cuairt seachtainiúil chuig seandaoine atá ina gcónaí leo féin timpeall na scoile.   Chomh maith le sin, téann baill eile ar an "Soup Run" gach tráthnóna Céadaoin, ag tabhairt anraith, ceapairí agus toitíní do dhaoine atá gan dídean ar shráideanna na cathrach.   Is é manna na scoile ná ‘per vias rectas’ – taisteal ar bhóthar an chirt -.   Cothaíonn fealsúnacht na n-Íosánach seirbhís do na bochtáin i measc a ndaltaí chomh maith le forbairt an dalta é féin.

Ar nós go leor scoileanna eile, tá áit an-tábhachtach ag cúrsaí spóirt sa churclam.   Imrítear spórt de gach saghas  i mBelvedere ach tá tús áite ag an rugbaí.  Cé gur buntáiste, dar linn-ne, a bheith lonnaithe i lár na cathrach ar an lámh amháin, ar an lámh eile tá mí-bhuntáiste ag baint leis freisin.   Tá na páirceanna peile i bhfad ón scoil, roinnt acu in aice le Páirc an Chrócaigh agus a bhformhór i gCabrach, timpeall trí mhíle ón gColáiste.   Caithfear busanna a eagrú chun na céadta dalta a bhogadh ansin ar a laghad dhá uair sa tseachtain, ach tá taithí na mblianta againn ar sin agus oibríonn sé ‘like clockwork’ mar a deirtear as Béarla.